Անկասկած հայոց լեզվի ճկուն լեզվական հնարավորությունների պարագայում բառերի նորաձեւությունը առերես ոչ առաջնային, բայց ակնհայտորեն գոյություն ունեցող երեւույթներ են: Եւ ակնհայտ է, որ գոյություն ունի նաեւ պիտակավորում հասկացությունը:Պարզից էլ պարզ է, որ երբ, հայոց լեզվի ոսկեղենիկ լեզվական ճկունությունները շրջանցելով, օգտագործում ես մինչ այդ արդեն մի քանի անգամ ինչ-ինչ շահագրգիռ անձանց կողմից օգտագործված բառեր, պիտակավորումը անխուսափելի է:

Օրինակ` անվիճելի փաստ է, որ “քաղբանտարկյալ”, “ազատություն”, “պայքար” բառերը օգտագործելու դեպքում դու նվազագույնը ընդդիմադիր ես կամ էլ ծայրագույն դեպքում` ավազակ ու ազգի խուժան կարող ես դուրս գալ: Բայց սա դեռ ամենը չէ: Փորձեք օգտագործել օրինակ “առաջ” կամ “հին ընկեր” կամ էլ գոնե “դրամավարկային քաղաքականություն”: Սա էլ հեշտ չի մարսվի:

Բառապաշարային այս կապկություններում հավանաբար ամենադժվարը լրագրողի խնդիրն է, ու երբ փորձում ես պարզապես կատարել քո մասնագիտական պարտականությունները` անկողմկանալ նյութ գրել, բախվում ես “լինել-չլինելու այս ծայրագույն գոյությանը”. կամ պիտի այնպիսի բառերով գրես, որի տակ ենթատեքստ գտնել հնարավոր չէ (իսկ մեր լեզվամտածողության պարագայում գրեթե անհնար է այդպիսի բառեր գտնել, հատուկ ճշտել եմ լեզվաբաններից) կամ էլ պիտի համակերպվես կիտակավորման հետ եւ ստանաս մի այդպիսին “դոշի բրոշկա”:

Քիչ ավելի բառապաշարային կողմից եթե անցնենք բովանդակության, ապա պիտակավորում են ստանում նաեւ այն լրատվամիջոցները, ովքեր փորձում են ամբիոն տրամադրել գոյության իրավունք ունեցող բոլոր կողմերին եւ չվախենամ այդ բառից` ընդդիմությանը: Ու եթե գրում ես այն, ինչ եղել է, հաստատ մեկը կգտնվի, որ խոսքդ “թարախություն” կհանի, առանց վերլուծելու ,թե որն է գրողի մեղքը, եթե իրադարձությունն է “թարախ”:  

Հաճախ վերընթերցում եմ ձեր մեկնաբանությունները եւ փորձում եմ հասկանալ, թե ինչով եմ արժանացել ձեր կշտամբանքներին ու պիտակավորմանը: ՉԷ, պարզից էլ պարզ է, որ բլոգում չկան նյութեր, որոնց ընթերցումից մի խումբ մարդկանց սրտերը հովանալու է եւ հայհոյախառն պարզավանքներից կյանքի նկատմամբ իմունիտետը բարձրանալու: Ոչ մի “հակա” կամ “համար” նյութեր չենք էլ պատրաստվում գրել, սա մեր խնդիրը չէ:

Բայց զարմանում եմ` ինչու եք վրդովվում “ազատությունից”(ներողություն արտահայտությանս համար): Եթե ձեզ տրված է հնարավորություն քննարկելու, քննադատելու եւ ձեր ասելիքը լայն զանգվածներին հասցնելու, ուրեմն ինչումն է խնդիրրը? Առնվազն ստրկամտություն է ազատությունը ամենաթողության վերածելը եւ իմ այն համոզմունքը, թե բլոգում հավաքված են լուրջ, քաղաքականապես հասուն եւ հստակ քաղաքացիական դիրքորոշմամբ մարդիկ, կամաց-կամաց ի չիք է դառնում:

Իհարկե, չեմ ժխտում, որ այստեղ գրում են նաեւ "վարձու ակտիվիստներ” եւ առնվազն միամտություն կլինի ձեր կողմից կարծելը, թե բլոգը վարելով, նմանատիպ ինֆորմացիայի չեմ տիրապետում եւ չեմ հասկանում` “ով ում ջրաղացին է ջուր լցնում”, բայց անգամ այս պարագայում հավատացած եմ, որ կառուցողական բանավեճեր եւ քննարկումներ իրոք հնարավոր են, ի վերջո, հենց այս զանգվածի գոյությամբ պայմանավորված:

Վերջին 2 օրվա ընթացքում, գուցե ժամանակավորապես, մեկնաբանությունների բաժնում հաստատման կարգ ենք մտցրել եւ բազմաթիվ մեկնաբանություններ, որ քիչ առաջ հաստատեցի, ասում են, որ “լավ եք արել կամ վատ, որ գրաքննություն եք մտցրել”: Գրաքննություն է արդյոք այն, որ բազմաթիվ զգուշացումներից հետո կարգ ու կանոն ես մտցնում բլոգում եւ ոչ սահմանափակում ինչ-ինչ անձանց ասելիքը? Եթե այո, ես հակված եմ համակերպվել ձեր բոլոր` ընդդիմադիր, գրաքննող պիտակավորումների հետ, բայց շարունակել “գլուխս կախած իմ գործն անել”` եթե ոչ առաքելության կամ նման բարձրագոչ բառերի էությունը ի կատար ածելու, ապա գոնե իմ աշխատանքը ինչպես հարկն է կատարելու համար:

Ներողություն եմ խնդրում, որ այս հարցում ես լավատես եմ, բայց հավատացած եմ, որ այնուամենայինվ մենք ի զորու ենք կառուցողական, կրեատիվ ու հանրային կարեւորություն ունեցող քննարկումներ անել եւ ուզում եմ հիշեցնել, որ այստեղ օդ ու ջրի նման կարեւոր է ձեր ներկայությունն ու կարծիքը:

Թող ուշացումով, բայց առաջարկում եմ ստեղծել քննարկումների ՄԵՐ բաժինը եւ պարտավորվում եմ ամեն շաբաթվա վերջում ձեր կարծիքներից նյութ պատրաստել եւ որպես հանրային կարծիքի մի ցուցիչ հրապարակել լրատվամիջոցներում ու բլոգերում` այն ավելի հասանելի դարձնելու համար: Միեւնույն ժամանակ դուք էլ պիտի պարտավորվեք հետեւել բլոգում գրելու պարզ կանոններին եւ միայն այսքանը:

“+1 սկզբունքով” (համոզված եմ այս արտահայտության օգտագործումն էլ հեշտ չեմ մարսի), գրեք ձեր մշտական նիկը, որ օգտագործում եք կամ պատրաստվում եք այսուհետ օգտագործել եւ հայտնեք ձեր պատրաստակամությունը(եթե կա այդպիսին)` մասնակցելու բլոգի այս նոր ռազմավարությանն ու քննարկուներին: Առաջարկությունները ու առարկությունները չմոռանաք, լավ? Եվ սկսած հաջորդ նյութից մենք կփորձենք մեր նախընտրած թեմաները բարձրացնել, քննարկել, դրանց հանրային հնչեղություն տալ` ընդհուպ մինչեւ տարատեսակ ակցիաների եւ պարզապես օգտագործել մեզ ընձեռնված “ազատ խոսքի” ամբիոնը, էլի ներողություն արտահայտությանս համար: 

Ափսոս երկար ստացվեց ասելիքս: Լավագույն մաղթանքներով` Բլանշ 

Մի տարի առաջ այս օրը "Ա1+"-ի կայքում հայտարարություն տրվեց, որ այսուհետ գործելու է "Ա1+"-ի բլոգը, կայքում գովազդային բաներ տեղադրվեց, բլոգում առաջին նյութը դրվեց…

Բլոգ բացելու գաղափարի համար դեռ երկար ժամանակ էինք մտածել, ընկերների հետ խորհրդակցել, անհրաժեշտությունը ծանր ու թեթեւ արել: Ի վերջո, հայկական ոչ լրատվամիջոց բլոգ չուներ դեռ, նախատիպը չկար, վերաբերմունքն էլ ամենաանլուրջից մինչեւ կարեւորագույն կամ սկանդալային կարող էր լինել…

Այսօր, բլոգի մեկ տարեկանին, ես մտածում եմ գրել բլոգի ձեռքբերումների, թերությունների կամ առավելությունների մասին, թե պարզապես ՁԵԶ շնորհակալություն հայտնել: Երեւի վերջինը, որովհետեւ "Ա1+"-ի բլոգը ի սկզբանե ստեղծվել էր ձեր` ընթերցողի կարծիքը լսելու, ձեզ հուզող թեման բարձրացնելու, քննարկելու այն ամենը, ինչը հրատապ է հատկապես ձեզ համար ու արդյունավետ ինֆորմացիայի փոխանակում ծավալելու հենց ձեր միջոցով: Ի վերջո, ճոռոմ չհնչի, բայց բլոգային քննարկումների միջոցով հույս ունեինք քաղաքացիական ակտիվության կոչելու` ինտերնետի այս դարում օրվա հրամայական այն համարելով:

Այսօր ամենից ավելի հույս ունեմ, որ մեր առջեւ դրված խնդիրները փոքր ինչ իրագործել ենք ու թեեւ պատահում ինչ-ինչ ուղղումներ չենք հասցնում անել կամ ինչ-ինչ թերացումներ ենք ունենում, բայց մեր գերխնդիրը` ձեր նեկրայությունը բլոգում ապահովում ենք, ինչը ամենակարեւորն է:

Ի վերջո, եթե փորձենք քիչ ավելի կրեատիվ  լինել, երբ մեկնաբանությունների միջոցով սկսում են ինչ-ինչ քարոզչություն անել,տեղեկատվություն կամ ապատեղեկատվություն տարածել, սա նվազագույնը նշանակում է, որ նման գործողությունների գնացողները քաջ գիտակցում են բլոգի օրական այցելությունների քանակի մասին եւ բլոգը լուրջ ամբիոն են համարում այն:

Այսօր, հենց բլոգի ծննդյան օրը, ուզում եմ քննարկել ձեզ հետ բոլոր բովանդակային, տեխնիկական եւ մյուս թերությունների ու խնդիրների մասին, որոնք պարբերաբար առաջանում են քննարկումների ժամանակ եւ որոնց լուծումը չեք ստանում: Մենք ձեր ակտիվության եւ առաջարկների կարիք ունենք, որովհետեւ սա ձեր բլոգն է եւ դուք պիտի առաջարկեք` ինչն է ձեզ հարմար կամ ոչ:

Եթե անուններով թվարկեի, շատ-շատ երկար նյութ պիսի ստացվեր: Ուստի միայն բավարարվում եմ ՁԵԶ բոլորիցդ շնորհակալություն հայտնելով եւ շնորհավորելով մեր բոլորի ընդհանուր մեծ ձեռքբերման համար` մենք բոլորս մասնակիցն ենք եղել հայկական լրատվական առաջին բլոգերից մեկի ստեղծման ու հայալեզու քննարկումների կուլտուրայի ձեւավորմանը: Խոնհարվում եմ ձեր`(ընթերցողներ կամ այցելուներ բառն այստեղ արդարացված չէ) բլոգի ակտիվիստների առաջ: Շնորհավոր: Լավագույն մաղթանքներով Բլանշ:

“Ա1+”-ի բլոգը իր գործունեության մեկ տարում հասցրել է բազմաթիվ վերելքներ ու անկումներ ունենալ, ակտիվ եւ պասիվ քննարկում կազմակերպել, նոր նախաձեռնություն իրականացնել կամ դադարեցնել: Հարկ եմ համարում բոլորի մասին ընդհանուր վերլուծականով ներկայացնել ձեզ:

Նախ այս մեկ տարում տարբեր նախաձեռնություններ ենք իրականացրել, հարոջվածներից էր նախագահի թեկնածուների կանանց հետ օն-լայն հարցազրույցների շարքը կամ ձեր առաջարկած թեմաների շուրջ քննարկումները:

Հետեւելով թեմաների արձագանքներին, մեկնաբանություններին եւ այցելությունների քանակին, եզրակացնում ենք, որ գործունեության առաջին վեցամսյակում ձեզ ամենից շատ հետաքրքրում էր, թե ով է զբաղեցնելու  նախագահի ապա մյուս կարեւոր պորտֆելները ով է: Հետաքրքրում էր հայ միլիոնատերների կյանքը, թե որտեղ եք հանգստանալու արձակուրդներին, բռնությունների, կրատվամիջոցների գործունեության, հոմոֆոբիայի դեմ պայքարի, Հայաստանում կրոնական ազատությունների, բողոքի ակցիաները, բոմժերն ու այլ թեմաներ:

Գործունեւության 2 վեցամսյակում նախագահական ընտրությունների եւ հետընտրական շրջանում ամեն ինչ քաղաքականացված էր եւ քննարկումները իրենցից ներկայացնում էին սուր վերլուծություններ ու քննադատություններ: Մինչեւ երկուհարյուրի հասնող մեկնաբանություններում բանավիճում էիք, քննարկում եւ թե ով է ավելի արժանավոր, ճիշտ ուղղության վրա կամ սխալ:Այս ժամանակաշրջանում էլ սկսվեցին ակնհայտ քարոզչությունն ու հակաքարոզչությունը, “տաքանալու դեպքում” նաեւ վիրավորանքները:

Արտակարգ դրության ժամանակաշրջանը պետք է առանձնացնեմ: Երբ, օրենքով սահմանաված կարգով դադարեցրեցինք նաեւ բլոգի գործունեությունը` կոչ անելով օգտվել ինֆորմացիայի փոխանակման ձեր իրավունքից, օրական բլոգի այցելությունները 68-72 հազարի հասան եւ ինֆորմացիոն հոսքը իրականում հսկակայակն էր, չհաշված նաեւ միտումնավոր ապատեղակատվությունն ու սադրանքները: Մեր տեղեկություններով բլոգում գրում էին բազմաթիվ լրագրողներ, բլոգերներ, քաղաքացիներ, որոնք ականատես էին միջադեպերի եւ այն մարդիկ, ովքեր առաջին ձեռքից տիրապետում էին ինֆորմացիայի:  Հենց այս շրջանում էլ սկսվեցին նաեւ հայհոյախառն մեկնաբանություններն ու մասնակիցների շրջանում անհանդուրժողական քննարկումները, ինչ ցավալի է:

Ներկայումս բլոգում աշխատում ենք շատ նյութերով չծանրաբեռնել եւ հնարավորություն տալ ձեզ քննարկումը ավելի զարգացնելու` համարերոլվ, որ ինֆորմացիան առանց այն էլ ստանում եք կայքից: Մեզ շարունակում է հետաքրքրել ձեր կարծիքը բոլոր զարգացումների մասին, որոնք տեղի են ունենում մեր երկրում, այդ իսկ պատճառով, վերլուծելով բլոգում թեմաատիկայի գործոնները, առաջարկում ենք ձեզ այս բաժնում առաջարկել բոլոր այն թեմաները, որոնք ձեզ հուզում են կամ որոնք քննարկումը ավելի նպատակահարմար եք տեսնում կամ որոնց մասին ինֆորմացիա չունեք, բայց կուզենայիք ունենալ: Գրեք մեզ: Լավագույն մաղթանքներով  Բլանշ

Հարգելի բլոգի ակտիվիստներ, ժողովուրդ ջան

Հաշվի առնելով այս մեկ տարվա փորձը եւ բլոգում մեկանաբանությունների նախադեպերը, հանրագումարի բերելով ձեր բոլոր առաջարկնեն ու պահանջները, մշակել ենք բլոգում գրելու պարզ կանոնների նախնական տարբերակ, որը պատրաստ ենք քննարկել ձեզ հետ եւ անհրաժեշտության դեպում փոփոխության ենթարկել:

Այսպես, բոգում գրելու առաջին նախապայմանը փոխադարձ հարգալից քննարկում ապահովվել է, ուստի արգելվում է բլոգում հայհոյանք, վիրավորանք եւ պիտակավում պարունակող բառեր գրել առհասարակ: Ծիծաղելի է, բայց բլոգում սպամ բառերի ցուցակ մտցնելուց հետո, որը բացառում է նմանատիպ բառերի մուտքը բլոգ ընդհանրապես, փոխում եք մի տառը կամ գրելաձեւը եւ շարունակում գրել այն, ինչ գրում եք: Խոսքը հայի ճկուն մտածողության մասին չէ, ոչ ոք դրան չի էլ կասկածում, ուղղակի կարծում եմ կարելի է այդքան պազրամիտ չլինել: 

Արգելվում է մեկ մեկնաբանության տեքստը մեկանգամից ավել դնել: Չի կարելի օգտագործել մինչեւ այդ ինչ-որ նիկով հանդես եկած մասնակցի անունը:  Հարգալից եւ հանդուրժողական եղեք հակառակ քաղաքական հայացքներ ունեցող մարդկանց հանդեպ եւ հարգեք խնդրում եմ բլոգի որդեգրած սկզբունքներն ու այստեղ գրող մարդկանց: Քննարկման թեմային կամ ընդհանուր քննարկմանը չվերաբերվող մեկնաբանությունները հեռացվելու են: "Ա1+"-ի բլոգը հայալեզու է եւ բլոգում խրախոսվում են հայատառ մեկնաբանությունները:

Որպես հետգրություն… սպասում ենք ձեր առաջարկություններին, դիտողություններին պարզ կանոնների եւ առհասարակ ցանկացած հարցի վերաբերյալ (տեխնիկական թերություններ, համակարգային սխալներ): Եթե դուք նոր բլոգ ունեք եւ ուզում եք ձեր մասին իմանան, գրեք մեզ եւ նպատակահարմարության դեպքում բլոգի հղումը կդնենք բլոգրոլում: Կարճ ասած ողջունում ենք ցանկացած առաջարկ: Հարգանքներով Բլանշ:

Ուրախ ենք վերջապես ողջունել ձեզ բլոգում եւ տեղեկացնել, որ վերսկսում ենք մեր աշխատանքները:Թեեւ որոշ տեխնիկական խափանումներով, բայց այսուհետեւ հասանելի է լինելու մեր լրատվական կայքը`www.a1plus.am, youtube-ի ալիքը www.youtube.com/a1plusnews, եւ իհարկե բնականոն հունով աշխատելու է բլոգը:

Սկզբում ուզում եմ շնորհակալությունս հայտնել բոլորիդ արտակարգ դրության օրերին` ինֆորմացիան բլոկադայի պայմաններում, ձեր ցուցաբերած ակտիվության եւ քաղաքացիական բարձր պատասխանատվության համար: Ապա հայտնելով, որ այսուհետ Ա1-ը ոչ միայն հետեւելու է, այլեւ ներկայացնելու, քննարկելու եւ մեկնաբանելու է ձեզ հետ, ուզում եմ մի քանի պարզաբանումներ անել եւ պատասխանել այս օրերին ձեր "ադմինին" ուղղված հարցերին:

Նախ ինչ էր կատարվում բլոգում վերջին 20 օրերի ընթացքում: Ինֆորմացիայի փոխանակման համատեքստում, որին միացել էին նաեւ լուրջ տեսաբաններ, լրագրողներ ու պարազապես ակտիվ մարդիկ, լինում էր նաեւ կազմակերպված ապատեղեկատվություն եւ հրահրության միտումնավոր փորձեր, որոնց մի մասը ընթերցողներիդ հաջողվում էր կասեցնել: Արտակարգ դրության արդեն 3-րդ օրից սադրանքների նոր մեթոդը միչեւ այդ բլոգում մեկնաբանություններ անձանց անունով գրելն էր, ինչին հետեւեցին նաեւ հայհոյախառն մեկնաբանությունների տարափը: Նշեմ, որ այս բնույթի մեկնաբանությունները գալիս էին հիմնականում նույն այն IP-ներից, որոնք կարգ ու կանոն էին պահանջում եւ որոնք այլ անուններով տարբեր հայրենասիրական կոչեր էին անում:

Բլոգում օրական 69-72 հազար այցելությունների պարագայում, երբ դժվարությամբ էր բացվում անգամ ադմինիստրատիվ մասը, ընթերցողների կողմից դրվում էին նույն մեկնաբանությունները մինչեւ 50 անգամ (շատ հաճախ այն կայքերի պաշտոնական հղորդագրությունները, որոնք փակված էլ չէին), դրանով իսկ ծանրաբեռնելով բլոգը եւ խափանումների բերելով: Մենք, որ դեմոնստրատիվ լռությամբ ոչ մի կերպ չէր միջամտում աշխատանքներին, միայն ժամանակ առ ժամանակ հեռացնում էր հայհոյանք պարունակող մեկնաբանությունները: Այսուհետ ոչ միայն կհետեւենք  բլոգում բնականոն գործունեւությանը, այլեւ կհետեւենք, որպեսզի վերոնշված նախադեպերը այլեւս չկրկնվեն մեր իրավասությունների ու բնականոն աշխատանքի պարագայում:

Ավելին արդեն արված են տեխնիկական որոշ լուծումներ եւ ուղղակի հնարավոր չէ մուտքագրել որոշ բառեր եւ արգելափակված են մասնակիցներից 2-ի IP-հասցեները: Հանգամանորեն ուսումնասիրված են բոլոր մեկնաբանությունները եւ հիմա արդեն առանց ավելորդ զգուշացումների ու բացատրությունների կնախաձեռնվեն բոլոր անհրաժեշտ միջոցները բլոգի բոլոր մասնակիցների իրավունքները պաշտպանելու համար: Պահանջում ենք նաեւ հարգել միմյանց, բլոգի որդեգրած սկզբունքները եւ պարզաբանումներից հետո գոնե հանդուժողական եւ քաղաքակիրթ քննարկում վարել: Շնորհակալություն:

«Երեւանում արտակարգ դրություն հայտարարելու հաջորդ օրը՝ մարտի 2-ին, Ազգային անվտանգության ծառայության (ԱԱԾ) աշխատակիցներն այցելեցին թերթերի խմբագրություններ` ներկայացնելով անստորագիր եւ չկնքված մի երկտող, որով զգուշացվում էր, որ եթե թերթերի հրապարակումները պարունակեն պաշտոնականից տարբերվող տեղեկատվություն, ապա տվյալ թերթի գործունեությունը կդադարեցվի: Նույն գիշեր տպարան տարված թերթերի նյութերը մանրակրկիտ ստուգել են ԱԱԾ աշխատակիցները եւ բանավոր հրահանգով արգելել տպագրությունը: Նկատի ունենալով, որ պաշտոնական կոչվող տեղեկատվությունն առնվազն միակողմանի է, չի արտացոլում կատարվածի ամբողջական պատկերը եւ առանց ընդհատումների եթեր է սփռվում շուրջ մեկ տասնյակ հեռուստաալիքներով` առանձին թերթեր պարզապես հրաժարվեցին լույս տեսնել, մյուսներն էլ հայտնվեցին հարկադիր պարապուրդի մեջ: Սա մեզ հիմք է տալիս հայտարարելու, որ ՀՀ իշխանությունները պարզապես արգելել են իրենց համար անցանկալի լրատվամիջոցների գործունեությունը: Մանավանդ որ, արտակարգ դրության պայմաններում հրատարակվող «յուրային» պարբերականների վրա ամենեւին էլ չէր տարածվել բացառապես պաշտոնական լրատվություն հրապարակելու պահանջը: Տեղեկատվական տեռորը լիակատար դարձնելու համար արգելափակվել են նաեւ ինտերնետային կայքէջերը: Ավելին, CNN ու Euronews հեռուստաալիքների թողարկումները, որոնք անդրադառնում են Հայաստանում կատարվող իրադարձություններին, ընդհատվում են, եւ փոխարենը հեռարձակվում են գովազդային հոլովակներ, իսկ «Ազատություն» ռադիոկայանի հեռարձակումը ընդհանրապես դադարեցվեց:Մենք հայտարարում ենք, որ այս ամենը ոչ միայն չի նպաստում հասարակության մեջ առկա լարվածության թուլացմանը, այլեւ խորացնում է ատելության ու թշնամանքի մթնոլորտը£ Պաշտոնական կոչվող տեղեկատվություն սփռող լրատվամիջոցների ճնշող մեծամասնությունը եւ մանավանդ մամուլի խոսնակները իրենց ագրեսիայով ընդամենը նպաստում են անառողջ տրամադրությունների բորբոքմանը եւ խորացնում են անվստահությունը պետության նկատմամբ£Ստեղծված իրավիճակում ոտնահարվել է տեղեկություններ տարածելու եւ ստանալու մեր սահմանադրական իրավունքը, խախտվել են խոսքի եւ մամուլի ազատության համընդհանուր ճանաչված սկզբունքները, լրատվամիջոցները կրում են նյութական կորուստներ, Հայաստանում իրականացվում է գրաքննություն, եւ մեր երկիրը հայտնվել է տեղեկատվական լիակատար շրջափակման մեջ:

«Ա1+»-ի նախագահ
«Առավոտ» օրաթերթի գլխավոր խմբագիր
Երեւանի մամուլի ակումբի նախագահ
«Ժամանակ Երեւան» օրաթերթի խմբագիր
«Ինտերնյուս» կազմակերպության ղեկավար
«Լրագիր» կայքէջի գլխավոր խմբագիր
«Հայկական ժամանակ» օրաթերթի գլխավոր խմբագրի տեղակալ
«Հայք» օրաթերթի գլխավոր խմբագիր
«168 ժամ» թերթի գլխավոր խմբագիր
«Հետք» էլեկտրոնային թերթի գլխավոր խմբագիր
«Հրապարակ» օրաթերթի գլխավոր խմբագիր
«Չորրորդ իշխանություն» թերթի գլխավոր խմբագիր
«Տարեգիր» թերթի գլխավոր խմբագիր
«ԱրմենիաՆաու» էլեկտրոնային հանդեսի խմբագիր

Ե.Գ. Հարգելի բլոգի ակտիվիստներ, կրկին անգամ հիշեցնում ենք, որ խուսափեք հայհոյանք, վիրավորանք եւ զրպարտություն պարունակող մեկնաբանություններից: Փոխադարձ հանդուրժողականության կոչ ենք անում եւ հուսով ենք զերծ կմնաք տարբեր սադրանքներից ու քաշքշուկից: Պարզապես օգտվեք ինֆորմացիայի փոխանակման ձեր իրավունքից եւ շարունակեք դրսեւորել քաղաքացիական ակտիվություն: Շնորհակալություն:

Հարգելի ընթերցողներ, առաջարկում ենք քննարկումը պարզապես շարունակել այստեղ: Նախորդները ծանրաբեռնված են եւ արդեն դժվարությամբ են բացվում: Շնորհակալ ենք ձեր ակտիվության համար:

ՕՐ 7-ՐԴ [15:12]

Քննարկումների նոր բաժինը բացում ենք նախորդների ծանրաբեռնվածությունը մեղմելու համար:
Շարունակում ենք զգուշացնել, որ խուսափեք վիրավորանք, սադրանք, հրահրություն եւ միտումնավոր ապատեղեկատվություն պարունակող մեկնաբանություններից, այլապես, խախտելով բլոգում մեկնաբանություններ անելու կոնֆիդենցիալության սկզբունքը, կհրապարարակենք մեկնաբանությունների հեղինակների տվյալները:Հուսով ենք նման խնդրի առաջ մեզ չեք դնի: Մաղթում ենք քաղաքակիրթ քննարկում: Շնորհակալություն

Հարգելի ընթերցողներ, վերջին հաղորդագրության տակ մեկնաբանությունների մեծաքանակության արդյունքում առաջացած ծանրաբեռնվածությունը մեղմելու համար առաջարկում եմ ձեզ քննարկումներն ու ինֆորմացիայի փոխանակումը տեղափոխել մեկնաբանությունների այս բաժին: Տեղեկացնում եմ նաեւ, որ բլոգի մեկնաբանությունների համակարգը այնպես է ստեղծված, որ 3-ից ավելի հղում պարունակող մեկնաբանությունները չեն երեւում մեկնաբանությունների բաժնում եւ սպասում են հաստատման: Այնպես որ կարիք չկա բազմաթիվ անգամ մուտքագրել նույն մեկնաբանությունը: Պարզապես սպասեք մինչեւ այն հաստատեն: Շնորհակալություն եմ հայտնում ձեր ակտիվության եւ քաղաքացիական բարձր պատասխանատվության համար: Խնդրում եմ դեռ չմոռանալ այն հանգամանքը, որ մեկնաբանությունների բաժնում տեղ գտած ինֆորմացիայի հավաստիության համար մենք պատասխանատվություն չենք կրում: Լավագույն մաղթանքներով Բլանշ:

Հարգելի ընթերցողներ, տեղեկացնում ենք ձեզ, որ "Ա1+"-ը դադարեցնում է իր աշխատանքը արտակարգ դրության այս 20 օրերին, քանի որ նպատակահարմար չի տեսնում միայն պաշտոնական տեղեկատվության հրամցնումը ձեզ (այլ բան նախատեսված չէ օրենքով): Բացի այդ հայկական տարբեր պրովայդերների կողմից արդեն արգելափակված է "Ա1+"-ի լրատվական կայքը եւ մեր հայաստանաբնակ ընթերցողների մեծ մասին հասանելի չէ անգամ կայքի արխիվը: Շարունակեք գրել մեզ բլոգում, օգտվեք ձեր` ներկայացնելու, քննարկելու եւ մեկնաբանելու իրավունքից: Մաղթում ենք ձեզ քաջ առողջություն եւ համբերություն: Կհանդիպենք 20 օրից: Լավագույն մաղթանքներով "Ա1+":