“Մարտի 1-ի” 9-րդ եւ 10-րդ զոհը
April 14, 2008
"Միքայելյան" հիվանդանոցում ապրիլի 11-ին մահացել 19-ամյա զինծառայող Տիգրան Աբգարյանը, ով վիրավորվել էր մարտի 1-ի լույս 2-ի գիշերը: Բժիշկները չեն կարողացել փրկել երիտաասարդի կյանքը, որը, ունեցել է պարոնոցային 6-րդ, 7-րդ ողների հրազենային-բեկորային կոտրվածքներ, իսկ վիրահատության ժամանակ պարզվել է, որ վնասվել է նաեւ ողնուղեղը: Ի դեպ, մարտի 4-ին ԶՈՒ գլխավոր շտաբի պետ, գեներալ-գնդապետ Սեյրան Օհանյանը հայտարարել էր, որ զինված ուժերից զոհեր եւ վիրավորներ չկան:
Այսօր մահացել է մարտի 1-ի իրադարձությունների հետեւանով վիրավոր Արարատի մարզի Լուսառատ գյուղի 29-ամյա բնակիչ Սամվել Հարությունյանը: Նա զինվորական չէր: Հարությունյանի ստացած հրազենային վնասվածքները բավականին խորն էին` վնասվել էր նրա գանգուղեղը, եւ ինչպես "Ա1+"-ին տեղեկացրեց Առողջապահության նախարարության մամուլի եւ հասարակայնության հետ կապերի վարչության պետ Ռուսլանա Գեւորգյանը, նա առաջին օրվանից շատ ծանր վիճակում է եղել. միայն վերջին օրերին էր սկսել ինքնուրույն շնչել, եւ արհեստական շնչառության սարքավորումն անջատվել էր:
Թեեւ Սամվել Հարությունյանը գիտակցության այդպես էլ չեկավ, բայց վերջին օրերին արձագանքում էր արտաքին ազդակներին. մասնավորապես, երբ գդալը մոտեցնում էին բերանին, նա անգիտակից վիճակում բերանը բացում էր: Ապրիլի 11-ին նրա վիճակը կտրուկ վատացել է, եւ նա անմիջապես տեղափոխվել է "Արմենիա" բժշկական կենտրոնի վերակենդանացման բաժանմունք, որտեղ էլ ժամը 19-ի սահմաններում մահացել է:
Մարտի 1-ի դեպքերից հետո դեռ 3 հոգի շարունակում են հիվանդանոցում գտնվել, որոնցից մեկի վիճակը հատկապես ծանր է. նա "Էրեբունի" բժշկական կենտրոնում է, նրա վիճակը կայուն էր, սակայն հանկարծ նկատվել է սեպսիս եւ վիճակի կտրուկ ապակայունացում: Նա կրկին տեղափոխվել է վերակենդանացման բաժանմունք:
Երիտասարդներից մյուսը վաղը դուրս է գրվելու հիվանդանոցից. նա ուներ հրազենային վնասվածք` ոտքի կոտրվածք: Նրա ոտքը դեռ գիպսի մեջ է, սակայն արդեն թույլատրվում է անցնել ամբուլատոր բուժման: Գր. Լուսավորիչ հիվանդանոցում գտնվող տուժածի վիճակը կայուն է, բայց առայժմ դուրս գրվելու մասին խոսք չկա:
